Waka Lu Münevve Akbana

Cayêk beno cayêk nêbeno. Wextun ra wextêk welatun ra welatêk dı, yo lu bena u yo legleg bena. Lu u legleg ge ge yeni tihet, qal keni, sohbet keni. Yobinun dır beni heval,

pêni dı vuni ma beni way u bıra. Lu u legleg qerar xu duni, beni way u bıra. Ruej ruej ser yen, aşm aşm ser yena, dem u dewruni viyereni; ruejêk lu legleg ra vuna:

-Ma way u bırayê yobinun ê, ez qayila tu dewet bıkeri, tı sıba bena mısafırê mı.

Legleg vuna:

-Waka lu, sarı u çımun mı ser, Homa biyar weri, eg yo qeza bela çin bu ez sıba bena mısafırê tu.

Ben sıbayerco, legleg xu kena hazır, kıncun neweyun duna xu ra, xu xemılnena, mısk şonena xu ra, keyê xu ra veciyena, verê xu şuna keyê waka lu. Xu bı xu vuna, ‘ Waka lu vendayo mı, ez dewet kerda, Homa bızun semedê mı, çı weri weşi kerdi hazır.’

Legleg, miyun xıyalun dı, kuena cehdı şına. Şına la seni şına. Gestver çızi zerreyê cı ra yena. Wext xıyalê werunê weşun kena aw kuena fek. Axıri şına resena keyê waka lu. Waka lu yena legleg vera, vuna tı xêr umeya, sarı u çımun ser umeya. Lu, legleg kerem kena zerre. Şıni zerre dı bınêk nışeni ru, hal u keyfê yobinun perseni, Lu wırzena, vuna:

-Ez sıfrı hazır keri ma nun bıwer.

Çımi legleg reqeni, aw kota fek, vuna derê lu cı ri çıta potu, çıta kerdu hazır? Axıri lu mutfaq ra veciyena, yo siniya sıfrin kerda xu desta, yo têltık nawa sini ser. Lu sini una

nuna ru u vuna:

-De kerem bıker, wa nunê ma serdın nibu.

Legleg uniyena eg çı bıvinu. Lu mastuwa pota u kerda yo têltık ser u arda ver dı nawa ru. Legleg zaf vêşun a, nequra xu liyesena, xu nata taduna weta taduna, nequra xu duna

têltık ru la mastuwa tayi nikuena fek. De hadê, de hadê; yona dor, yona dor, yona dor… Legleg kena nêkena nêeşkena qet hına guerê pıronêk zi mastuwa ra bıwero. Nequra sura sıpi ê legleg gınena têltık ru u şıkiyena. Axıri legleg nêeşkena hındê mısqal tayi bıwero.