Hire Kıtabi Sait Çiya

Mabênê Gomê Peyê Koyi be Suke de necdiye saate raye esta. Koyê Mazeni miyanê suke be gome de ro. Peyê koyi de gome, verê koyi de ki suke biye. Gomê Peyê Koyi de teyna ju çê esto, çêyê Bertali. Bertal, xanıma xo Pule be dı domanê xo. Domani hona qıci yê. Cemşi şeş serri yo, Zercane newe kota serra çarine. Pule çê de gurina, Bertal teber de.

Çê u teber honde jubin ra duri niyê. Têzerre de rê. Tebero ke vana, baxçe yo, merga kışta bani ya, çerê maliyo ke der u dorme der o, ow o. Ban, zerre bırri de ro. Teyna hêgayê xo tenê duri yê. Hêgayi cêr deşte de rê. Waxtê toxım ramıtên u têpiya çinitene de şonê cêr. Zobina vist u çar saati dormê banê xo de rê. Vengê jubini hêsinê pê.

Bertal zêde cayê nêşono. Çıtur şêro ke kar u gureyê xo esto. Teyna ro. Domani qıci yê. Geganê şono lewê vıstewrunê xo, dewa Pule. Hama meymanê xo kem nêbenê, mobetê xo zaf weş o. Ju ki şono suke, suke doyem de manena, şono çi-mi herneno. Ron, toraq, pêndir, gegane pırç roşeno, suke ra postalan, pazen u kuras, sole, seker, çay, gaz herneno. Zobina zêde karê xo be suke çin o. Heya qalê neweşiye mekerime. A çetın a. Zımıstan vore ke vore, ko u deştan cêna bınê hukmê xo, isanan caverde, teyrê perrıni benê hesir.