Edebiyato Modern Ê Zazaki Ibrahim Dağılma

Tanıtım Metni:

Edebiyat hetê zıwan, kultur, cuyiş, tarix, baweri u wexti ra qey her milet u mıntıqayi yo resim, durşim u êsayiş o. Milet u mıntıqayi bı vatışanê nuştekiyan u fekkiyan xu dani şınasnayiş. Derd, dec, şayi, eşq, hesret, kurm u baweriya insanan u cematan bı edebiyati yeni vatış. Edebiyat, qey her milet u mıntıqa yo daşınasyayiş o; yo hunero rınd, zıxm u mecburi yo. Ino hunero rınd; goreyê wext, ca, hedise, mewzu, dewır, ma u ê binan vıraziyeno, şekıl geno u zereyê yo çarçewa dı ca geno. Edebiyat yo ehtiyac o u ına ehtiyaci qey her milet u mıntıqa esta. Edebiyatê Zazaki, wareyê edebiyatê nuşteki dı edebiyatêko newe yo. Seba ınay ına ehtiyaci, Zazaki dı xu tor zaf dana hiskerdış. Ina çarçewa dı edebiyatê Zazaki dı hişa modern hema newe ya u ıno ware dı xebati zi hema newe yi. Ini xebatan ser vındertış, qey inan yo çarçewa vıraştış, yo cıgêrayiş u tetqiqkerdış yo ehtiyac u lazım o. Ina xebat ına ehtiyaci sera ameya vıraştış.

Edebiyato modern; dezgeyanê urfiyan, edebiyatê klasiki, vateyanê diniyan u qeydeyanê cematkiyan red keno. Ino edebiyat çiyan u usulanê neweyan goreyê fam u hişa wext qebul keno. Ini çiyan u usulan paweno u kırışeno wareyê edebiyat u seneti. Eseranê edebiyan ê modernan dı tenaquzê rumetanê cematkiyan, delêlıyayiş u dengbiyayişê insani, weziyetê zerranê timiyanan, usulanê runeyiyan ri yo sarewedartış xu ramocneno. Eseranê modernan ê edebiyan dı eğleb yo vatış u uslubo realist u alegorik esto. Modernizm, zereyê cereyananê felsefiyan u edebiyan ê esriyan dı qewımiyeno u tewıranê edebiyan ıno qewımiyayiş gore etud keno. Merkezê modernizmi dı bı xu insan esto u ıno insan eseranê edebiyan dı zereyê hediseyan dı ca geno.